مستقبل کے فوجی

مشہور روبوٹک انجینئر دینئل ایچ ولسن (Daniel H. Wilson) کہتے ہیں: ”انسان ایک مسکین اور قابلِ رحم جاندار ہے… ہمارے تیز ناخن نہیں ہیں… ہمارے دانت بہت چھوٹے ہیں… ہمارا جسم ایک بہت نازک اور حساس جلد سے ڈھکا ہوا ہے… ہم میں سے اکثر تو ننگے پاؤں باہر نہیں چل سکتے”.

اگر ماضی سے حال کا مقابلہ کیا جائے تو انسان نے عسکری میدان میں بہت ترقی کی ہے اور تلوار سے مشین گن تک کا سفر نسبتاً کافی جلدی طے کیا ہے.. تاہم ایک مسئلہ ہمیشہ سے ترقی یافتہ ملکوں کے عسکری اداروں کے لیے پریشان کن رہا ہے اور وہ ہے جنگوں میں ہلاک یا زخمی ہونے والے فوجی.. اس مسئلہ کے حل کے لیے امریکی وزارتِ دفاع کا تحقیقی ادارہ ڈارپا (‫‪DARPA‬‬) نے ‫‪CT2WS‬‬ نامی ایک پراجیکٹ شروع کر رکھا ہے جس کا مقصد فوجیوں کو بقاء کے مزید وسائل فراہم کرنا، خطرے سے بروقت آگاہ کرنا، اور فوجی کے دماغ کے ‫‪Prefrontal Cortex‬‬ نامی حصے سے تجاوز کرتے ہوئے ایک ہائی کوالٹی تصویر لوڈ کرنا ہے..

تاہم صرف یہی ایک پراجیکٹ نہیں ہے، جیسا کہ اوپر کی تصویر سے واضح ہے فوجیوں کو ‫‪Exoskeleton‬‬ نامی ایک خارجی ڈھانچہ فراہم کیا جائے گا، یہ ایک مشینی سوٹ ہے جو بلیٹ پروف ہوگا، یہ سوٹ فوجی کو دگنی جسمانی طاقت دے گا تاکہ فوجی ہر وہ مشکل کام کر سکیں جس میں بہت زیادہ جسمانی طاقت کی ضرورت ہوتی ہے، یہ سوٹ فوجی کو درکار مناسب سپورٹ فراہم کرے گا جس سے فوجی عام حالت سے دس گنا وزنی چیز اٹھا سکے گا، نہ صرف یہ بلکہ یہ سوٹ پہن کر فوجی کافی پھرتیلا ہوجائے گا اور تیزی سے حرکت کرنے لگے گا.. اس سوٹ میں سکینر نصب ہوں گے جو جنگ کے علاقے کو سکین کر کے فوجی کو دشمن کے مقام کا ٹھیک ٹھیک پتہ بتائیں گے.. اس سوٹ کو پہن کر فوجی مزید اسلحہ بھی ساتھ رکھ سکے گا کیونکہ اس سوٹ کی وجہ سے اسے ان کا وزن محسوس نہیں ہوگا..

ایک اور چیز جو ڈارپا ممکن کرنا چاہتی ہے وہ ہے فوجی کو اڑنے کی صلاحیت فراہم کرنا چاہے مختصر مسافت ہی کی کیوں نہ ہو تاکہ فوجی دشمن کے بچھائے جال سے بچ کر دور جاسکے..

یہ سمجھنا قطعی مشکل نہیں ہے کہ ڈارپا اور اس جیسے دیگر ترقی یافتہ ممالک کے اداروں کا مقصد کیا ہے، وہ ایک ایسا فوجی تخلیق کرنا چاہتے ہیں جو ناقابل تسخیر ہو اور ہر طرح سے برتر ہو جیسا کہ ذیل کی تصاویر میں دکھایا گیا ہے:

اگلے دس سالوں میں امریکی فوج کو ایسا اسلحہ مل جانے کا مطلب یہ ہے کہ جنگ اب روایتی نہیں رہنے والی ہے…