Qumranet کا ریڈ ہیٹ سے الحاق
By makki2
Qumranet جو ورچولائیزیشن ٹیکنالوجی KVM پر کام کر رہے ہیں نے ریڈ ہیٹ کو جوائن کر لیا ہے، ریڈ ہیٹ کو Qumranet کی KVM یعنی Kernel Virtual Machine میں دلچسبی ہے جسے وہ Red Hat Enterprise Linux میں شامل کرنا چاہتے ہیں کیونکہ ان کے خیال میں یہ اگلی نسل کی ورچولائیزیشن ٹیکنالوجی ہے جو لینکس سے مکمل طور پر موافقت رکھتی ہے.
ابنٹو کے آٹھ ملین صارفین
By makki2
معلوم ہوتا ہے کہ ابنٹو کی پاپولیرٹی کافی بڑھتی جارہی ہے.. کینونکل کی طرف سے جاری کردہ آخری اعداد وشمار کے مطابق ابنٹو کے دنیا بھر میں آٹھ ملین صارفین ہیں..!! یہ اعداد وشمار ایک دوسرے سوال کو جنم دیتے ہیں کہ دیگر ڈیسٹروز کے کتنے صارفین ہیں..؟! اس طرح مجموعی طور پر لینکس کے کتنے صارفین ہیں..؟؟ اور پاکستان میں لینکس کے صارفین کتنے ہیں..؟!؟!
آخری سوال کا افسوس ناک جواب شاید سب کو معلوم ہے..!؟
وکیپیڈیا مسلم سائنسدان مہم
اردو وکیپیڈیا پر مسلم سائنسدانوں کے حوالے سے موضوعات پوسٹ کرنے کی میری مہم جاری وساری ہے، آج میں نے ذیل کے سائنسدانوں کو نمٹایا ہے:
ابن زہر
الجزار
ابن الہیثم
ابن وحشیہ
باقیوں کو بھی فرصت سے نمٹا دوں گا.
ابنٹو 8.10 پر ایک نظر
ابنٹو کے اگلے ورژن کی آمد میں صرف دو ماہ باقی ہیں، میں نے یہ دیکھنے کی کوشش کی کہ ابنٹو والوں نے اس دفعہ ہمارے لیے کیا کیا چھپا رکھا ہے مگر دیکھنے پر پتہ چلا کہ کوئی اتنی بنیادی تبدیلیاں نہیں ہیں.. ہاں بعض اضافے بہترین اور قابلِ تعریف ہیں.
مجموعی طور پر ابنٹو 8.10 سوفٹ ویر اپڈیٹ پر مشتمل ہے خاص طور سے کرنل اور ڈسپلے سرور X.org ، ایک نیا نیٹ ورک ٹول متعارف کرایا گیا ہے جو تیسری نسل G3 کی وائرلیس ٹیکنالوجی کو سپورٹ کرے گا، اس وقت بھی آپ تیسری نسل کے ان نیٹ ورکس سے آسانی سے متصل ہوسکتے ہیں لیکن ان کی ترتیبات نئے صارف کے لیے بہر حال ایک مسئلہ ہے چنانچہ ابنٹو کے ڈیولپروں نے یہ ذمہ داری اپنے سر لی جس کا نتیجہ یہ نیا نیٹ ورک ٹول ہے.
By makki2
مہمان
اس دفعہ مہمانوں کے لیے ایک نیا کھاتہ یا اکاؤنٹ بنایا گیا ہے جو ایک اچھا اقدام ہے کیونکہ ہر شخص پر بھروسہ نہیں کیا جاسکتا، اس کی صلاحیتیں نہ ہونے کے برابر ہیں.. یہ دیگر صارفین کی فائلوں تک رسائی حاصل نہیں کرسکتا اور نہ ہی اپنی فائلیں مستقل طور پر محفوظ کرسکتا ہے کیونکہ اس کی ساری فائلیں صرف وقتی ہوں گی..
By makki2
پرائیوٹ انکرپٹڈ فولڈر
نئے ابنٹو میں ایک خوبی پرائیویٹ فولڈر کی ہے (~/Private) اس فولڈر تک دیگر صارفین رسائی حاصل نہیں کر سکیں گے کیونکہ یہ پاسورڈ زدہ ہوگا.. بیٹا مرحلہ میں اسے فعال کرنے کے لیے کچھ کمانڈز لکھنے کی ضرورت پڑتی ہے امید ہے فائنل ورژن میں ایسا نہیں ہوگا.
کلینر
کچھ اپگریڈز کے بعد نظام میں غیر ضروری پیکج اور کرنل وغیرہ جمع ہوجاتے ہیں جو نظام کی رفتار پر اثر انداز ہوتے ہیں.. اس ورژن میں یہ کلینر سارا کچرا صاف کر کے نظام کو تر وتازہ رکھے گا.
یو ایس بی پر تنصیب
اس دفعہ ابنٹو کو یو ایس بی فلیش میموری پر نصب کیا جاسکے گا.
تیز تر سٹارٹ اپ
کیڈی کا نیا ورژن کچھ سیکنڈوں میں کام کرنے کے لیے تیار ہوتا ہے مگر گنوم زیادہ وقت لیتا ہے اور چونکہ ہم میں سے کوئی انتظار کا شوق نہیں رکھتا چنانچہ ڈیولپر اس کا سٹارٹ اپ تیز تر کرنے پر توجہ دے رہے ہیں.
نیا انسٹالر
ابنٹو کے انسٹالر پر ایک عرصہ سے توجہ نہیں دی گئی مگر اس ورژن میں اسے دوبارہ سے ڈیزائن کرنے کی کوشش کی جائے گی اگرچہ الفا ۴ میں کوئی تبدیلی نہیں دیکھی گئی.
ڈرائیورز کی خودکار تنصیب
یہ خوبی اگرچہ سابقہ ورژن میں بھی تھی کہ کچھ ڈسپلے اور وائرلیس کارڈز کے ڈرائیور خود کار طور پر اتار کر نصب کردیے جاتے تھے اس بار اس میں پرنٹرز کے ڈرائیورز بھی شامل کردیے گئے ہیں.
فونٹ کانفیگ کے لیے تصویری مواجہ
پہلے فونٹ fonconfig کی ترتیبات ایڈیٹر سے کرنی پڑتی تھیں اس بار اس کے لیے ایک عدد تصویری مواجہ تیار کیا گیا ہے.
ناؤٹلس میں ٹیب
جی ہاں! اب آخر کار ناؤٹلس فائل براؤزر میں ٹیب شامل کردیے گئے ہیں..
By makki2
سناپٹک میں تیز تر تلاش
اس بار سناپٹک کے مواجہ میں ہی ایک تلاش کا خانہ دے دیا گیا ہے اب انٹر دبانے کی ضرورت نہیں بس کسی پروگرام کا نام لکھیں اور وہ آپ کے سامنے.
By makki2
کچھ دیگر تبدیلیاں
اگرچہ کافی ساری چھوٹی موٹی تبدیلیاں کی گئی ہیں مگر کچھ قابلِ ذکر یہ ہیں: فلیش کی بہتر سپورٹ، ڈی وی ڈی سے تیز تر تنصیب، بہتر پاور مینجمنٹ، سپیلنگ چیک میں بہتری وغیرہ..
وکیپیڈیا کا خوف
کراچی میں ابو شامل صاحب سے اکثر ملاقات رہا کرتی تھی، اس کی ایک وجہ یہ بھی تھی کہ اتفاق سے ان کے آفس اور میرے گھر میں صرف چند قدم کا فاصلہ تھا، ساتھ ہی ایک چائے کا ہوٹل تھا جہاں ہم چائے نوش فرمانے کے ساتھ ساتھ لینکس کی سیڈیوں کا تبادلہ بھی کیا کرتے تھے.. ابو شامل صاحب ہر ملاقات میں مجھے اردو وکیپیڈیا پر آنے کی پرزور دعوت دیا کرتے تھے (گویا وگیپیڈیا انہی کی ہو) اور میں ہر بار یہ بہانہ بنا کر بات ‘گول’ کرجاتا تھا کہ مجھے وکی پر لکھنا نہیں آتا.. اور یہ سچ بھی ہے.. مجھے واقعی وکی پر لکھنا نہیں آتا تھا.. دوسری وجہ یہ بھی تھی کہ میں اپنے فضول قسم کے پراجیکٹس سے فارغ ہی نہیں ہوتا تھا کہ وکیپیڈیا پر جانے اور اس کے عجیب وغریب ایڈیٹر میں لکھنے کا جوکھم اٹھاؤں..
جب میں نے مسلم سائنسدان کتاب برقی شکل میں شائع کی تھی (اس کے علاوہ میرے پاس شائع کرنے کا کوئی طریقہ بھی نہیں) تو انہوں نے اس کا مواد اردو وکیپیڈیا پر شائع کرنے کی اجازت طلب فرمائی تھی جو میں نے گویا ازراہِ کرم مرحمت فرمادی تھی.. مگر انہوں نے اس پر عمل (جیسا کہ اور بہت ساری باتوں پر) نہیں کیا کہ خامخواہ اپنی ہر کہی بات پر عمل نہیں کرنا چاہیے.. یہ بری بات ہوتی ہے..
خیر کل میں نے خامخواہ ہی وکیپیڈیا پر شمولیت اختیار کرکے گویا ان کی آخری خواہش پوری کردی.. اس پر طرہ یہ کہ چار عدد مسلم سائنسدانوں کے بارے میں لکھ بھی ڈالا جو کہ یہ ہیں:
البوزجانی
ابن باجہ
ابن النفیس
ابن ابی اصیبعہ
اب اگر شامل صاحب میرے اس مذاق کو سنجیدہ لے لیں تو یہ ان کی غلط فہمی ہی ہوگی کہ مجھے اب بھی وکی پر لکھنا نہیں آیا.. میں نے تو بس کتاب سے کاپی پیسٹ کی طاقت استعمال کرتے ہوئے وکی کے ایڈیٹر کو چھیڑے بغیر موضوعات پوسٹ کردیے باقی سائنسدانوں سے ان شاء اللہ بعد میں نمٹوں گا ویسے بھی اردو وکیپیڈیا میں موجود مسلم سائنسدانوں کی فہرست میری کتاب کی فہرست سے کافی مختلف ہے یعنی کچھ وہاں ہیں تو یہاں نہیں ہیں اور کچھ یہاں ہیں تو وہاں نہیں ہیں..مگر یہاں وہاں سے زیادہ ہیں چنانچہ کیا ہی اچھا ہو کہ فہرست میں وہ نام بھی شامل کردیے جائیں جو میری کتاب میں ہیں اور اردو وکیپیڈیا کی فہرست میں شامل نہیں ہیں.. مگر ایسا ہونا شاید ممکن نہ ہو سو میں انہی ناموں کو اپڈیٹ کروں گا جن کے بارے میں میری کتاب میں کچھ موجود ہے.. ممکن ہے کہ مستقبل میں وکیپیڈیا کا فعال رکن بن جاؤں پر کل کس نے دیکھا ہے..!؟
فائر فاکس 2 اپگریڈ
By makki2
صرف ایک ہفتے میں فائر فاکس 2 کے 41 ملین صارفین کو فائر فاکس 3 پر اپگریڈ کردیا گیا ہے.. یعنی کوئی 4097 اپگریڈ فی منٹ..!! فائر فاکس بھی کھڑکیاں توڑے جارہا ہے..
کیڈی 4.1 کی پہلی اپڈیٹ
By makki2
کیڈی کی کمیونٹی نے کیڈی 4.1.1 کی پہلی اپڈیٹ کے اجراء کا اعلان کیا ہے، یہ اپڈیٹ کیڈی 4.1 کے اجراء کے کوئی ایک ماہ بعد جاری کی گئی ہے.
By makki2
اس اپڈیٹ میں بہت سارے بگ فکس کیے گئے ہیں جن میں براؤزر کی رفتار بڑھانے اور پلازما ڈیسک ٹاپ کی بہت ساری خامیوں کو دور کیا گیا ہے.
سب سے سستا لیپ ٹاپ
By makki2
چائنا کی HiVision کمپنی نے اب تک کا سب سے سستا لیپ ٹاپ متعارف کرایا ہے.. اس لیپ ٹاپ کی قیمت صرف 98 ڈالر ہے.. خدمتگار نظام کے طور پر اس میں لینکس نصب ہے جبکہ MIPS کے پراسیسرز استعمال کیے گئے ہیں.. اس لیپ ٹاپ میں WiFi وائرلیس کی سپورٹ بھی شامل ہے جبکہ ایک پورٹ وائرڈ نیٹ ورک کے لیے بھی دی گئی ہے.. سٹوریج ایک گیگا بائٹ اور تین یو ایس بی پورٹس کے ساتھ اس میں SDHC کارڈ ریڈر بھی شامل ہے.
